Կողբի Գեղարվեստի Դպրոց
ԼԻՆԵԼ ԱԶԱՏ ԻՆՉՊԵՍ ԲՆՈՒԹՅՈՒՆԸ, ՄԱՔՈՒՐ, ԱԶՆԻՎ, ԽՈՐ ԻՆՉՊԵՍ ԲՆՈՒԹՅՈՒՆԸ…
Կողբի գեղարվեստի դպրոցը բարեգործական, ինքնատիպ կրթական արվեստի կենտրոն է։
- Մասնագիտացված կրթություն է տրամադրում նկարչության, կիրառական արվեստների, քանդակագործության և թվային գրաֆիկայի ոլորտներում։
- Բաց է բոլոր արվեստասերների և սովորել ցանկացողների համար։
- Հիմնադրվել է 1999 թ․-ին՝ գեղանկարիչ Կարապետ Ղուլիջանյանի նախաձեռնությամբ։
- Նպատակն է համախմբել համայնքի արվեստասերներին և բացահայտել շնորհալի երիտասարդներին։
- Ամեն տարի շուրջ հարյուր աշակերտ ստանում է մասնագիտական կրթություն՝ հետագայում ԲՈՒՀ ընդունվելու հնարավորությամբ։
- Դպրոցը միաժամանակ կրթական հաստատություն, արվեստանոց և արհեստանոց է՝ վարպետաց դասերով ու ստեղծագործական ծրագրերով։
- Այստեղ գործում են «Yereqnuk Handicrafts» , «Koghb Art Jewelry», «Koghb Digital Studia», <<Koghb Ceramics>> ստեղծագործական նախաձեռնությունները։
- Ունի ցուցասրահ, որտեղ կազմակերպվում են տեղական և միջազգային ցուցահանդեսներ։
- Ամենամյա ավանդույթ է դարձել մեկամսյա ամառային պլեներ-սիմպոզիումը՝ Հայաստանի և արտերկրի արվեստագետների մասնակցությամբ։
ՍՊԱՍՎՈՂ ԻՐԱԴԱՐՁՈՒԹՅՈՒՆՆԵՐ
Գարնանային պլեներ
Գարնանային պլեներ աշակերտների համար։
ցուցահանդես
Տարեվերջյան ցուցահանդեսՄիջին և ավագ դասարանի սաների աշխատանքների ցուցահանդես։ Մուտքն ազատ է բոլորի համար։
Պլեներ 2026
ՊԼԵՆԵՐ — ՍԻՄՊՈԶԻՈՒՄ 2026
Կողբի գեղարվեստի դպրոցը կազմակերպում է 22-րդ պլեներ-սիմպոզիումը։
Տևողությունը՝ օգոստոսի 1-ից 20-ը։
Մասնակցության համար կարող են դիմել 18 տարեկան և բարձր տարիքի նկարիչներ։
Պայմանների մասին տեղեկություն ստանալու համար կարող եք գրել դպրոցի ֆեյսբության էջին, մինչև հուլիսի 20-ը։
Մեր մասին
Կողբի գեղարվեստի դպրոց
Կողբի գեղարվեստի դպրոցը բարեգործական կրթական արվեստի ինքնատիպ կենտրոն է։ Կենսունակ ու անկախ այս արվեստի դպրոցը մասնագիտացված կրթություն է տալիս նկարչության, կիրառական արվեստների, քանդակագործության և թվային գրաֆիկայի ոլորտներում։ Դպրոցը բաց է բոլոր ուսանել ցանկացողների և ազատ արվեստասերների համար։
Կողբի գեղարվեստի դպրոցը հիմնադրվել է 1999 թվականին՝ համագյուղացի գեղանկարիչ Կարապետ Ղուլիջանյանի նախաձեռնությամբ։ Դպրոցի նպատակն է եղել համախմբել Կողբի և շրջակա համայնքների արվեստասերներին, ձևավորել ոգեշնչող ստեղծագործական միջավայր, բացահայտել և կրթել տարածաշրջանի շնորհալի երեխաներին ու երիտասարդներին։
Կողբի գեղարվեստի դպրոցը մշտապես աչքի է ընկել իր ինքնատիպ ու նվիրված արհեստավարժ արվեստագետների թիմով, որոնց ջանքերի շնորհիվ դպրոցի պայմաններն ու գործունեությունը շարունակաբար զարգանում են։
Ամեն տարի դպրոց են հաճախում շուրջ հարյուր աշակերտներ շրջակա համայնքներից։ Այստեղ նրանք ստանում են պրոֆեսիոնալ կրթություն, որն իրենց հնարավորություն է տալիս հետագայում շարունակել ուսումը Հայաստանի տարբեր բարձրագույն ուսումնական հաստատություններում։
Կողբի գեղարվեստի դպրոցը միաժամանակ դպրոց է, արվեստանոց և արհեստանոց։ Այստեղ դասավանդում և ստեղծագործում են՝ պարբերաբար կազմակերպելով վարպետաց դասեր՝ նկարչության, խեցեգործության, գեղարվեստական մետաղագործության, աքսեսուարների պատրաստման և դեկորատիվ-կիրառական արվեստի տարբեր ուղղություններով։
Դպրոցի արվեստագետ-ուսուցիչները հիմնել են մի շարք նախաձեռնություններ, այդ թվում՝ «Երեքնուկ» ստեղծագործական խումբը՝ նկարազարդ ձեռագործ աքսեսուարների արտադրանքով, «Koghb Art Jewelry» բրենդը՝ մետաղյա զարդերի բազմազան տեսականիով, ինչպես նաև խեցեգործության փոքրիկ արտադրամասը։ Ավանդական արվեստի կրթության հիմքի վրա դպրոցում գործում է «Կողբի թվային ստուդիան», որը մասնագիտական գիտելիքներ է տալիս համակարգչային գրաֆիկայի, եռաչափ մոդելավորման, լուսանկարչության և վեբ ծրագրավորման ոլորտներում։
Կողբի գեղարվեստի դպրոցն ունի գեղեցիկ ցուցասրահ, որտեղ ներկայացվում են ոչ միայն աշակերտների և ուսուցիչների աշխատանքները, այլև պարբերաբար կազմակերպվում են անհատական և խմբային ցուցահանդեսներ՝ Հայաստանի և արտերկրի արվեստագետների մասնակցությամբ։
Դպրոցի գործունեության տարիների ընթացքում անցկացված բազմաթիվ միջոցառումներից ավանդական է դարձել ամենամյա, մեկամսյա ամառային պլեներ-սիմպոզիումը, որը Կողբի գեղարվեստի դպրոց է համախմբում բազմաթիվ արվեստագետների Հայաստանից և արտերկրից։
ՄԵՐ ԹԻՄԸ
ԿԱՐԱՊԵՏ ՂՈՒԼԻՋԱՆՅԱՆ
Հիմնադիր
ԱՆԱ
ՆԱՍԻԲՅԱՆ
Նկարիչ
մոդելավորող
ԱՐՈՒՍՅԱԿ
ՓԱՇԻԿՅԱՆ
Նկարիչ
մանկավարժ
ԱՐԱ
ՂՈՒԼԻՋԱՆՅԱՆ
թվային
քանդակագործ
ՍԱԹԵՆԻԿ ՂՈՒԼԻՋԱՆՅԱՆ
?
ՀՌԻՓՍԻՄԵ ՄԱՆԹԱՇՅԱՆ
Նկարիչ մանկավարժ, Խեցեգործ
ՀԱՐՈՒԹՅՈՒՆ ՎԱՐԴԱՆՅԱՆ
Նկարիչ
մանկավարժ
ԱՐՄԻՆԵ ԱՄԻՐԱՂՅԱՆ
Նկարիչ
մանկավարժ
ՌՈՒԶԱՆՆԱ
ԱՄԻՐԶՅԱՆ
Նկարիչ մանկավարժ, Խեցեգործ
ՕՖԵԼՅԱ
ՎԱՐԴԱՆՅԱՆ
Նկարիչ մանկավարժ, Խեցեգործ
ԱՐԵԳ
ԱՄԻՐԱՂՅԱՆ
3D մոդելավորող
Կարծիքներ…
Ինձ միշտ զարմացրել է, որ չնաշխարհիկ բնությունը չի ծնում գրողների, երաժիշտների, նկարիչների նշանավոր անհատականություններ, որովհետև այն զգացողությունները, հուզական ու գեղարվեստական լիցքերի այն գամման, որ Աստծո շնորհիվ ու ճակատագրի կամոք մեզ է պարգևված, իսկապես որ բացառիկ է։ Բայց ինձ երբեք չի լքել այն վստահությունը, որ հասարակության ընդերքում գաղտնապահված է արարչագործության այդ գենը։ Միայն թե հարկավոր է տեր կանգնել, կազմակերպել, սատարել, հունի մեջ դնել հատկապես մատաղ սերնդի ստեղծագործական ունակությունները։
Ահա, վերջապես, հոգևոր համատարած ճգնաժամի պայմաններում, հայտնվել է այդ կազմակերպիչ-նվիրյալը՝ տաղանդավոր գեղանկարիչ Կարո Ղուլիջանյանը։ Ես հիացմունքով դիտում եմ այս շնորհալի դեռահասների աշխատանքները, և ինձ պարուրում է գույների խրախճանքից, երևակայության թռիչքներից, ստեղծագործության բռնկումներից ճառագող տաք ու ապրեցնող զգացումը։
Ես երջանիկ եմ, որ այս արվեստանոցը իր գոյությամբ մերծում է ոգու սովի ուրվականը, որ նոր սերնդին, իր հավատավոր ուսուցիչների ջանքերով, հետաքրքրում են հոգևոր արժեքներ։
Ես ձեզ մաղթում եմ նկարչի համար ամենակարևորը՝ ցուցադրվելու և գնահատվելու բացառիկ հաճելի բազմաթիվ առիթներ։
Լևոն Անանյան
Հայաստանի գրողների միությաննախագահ
Վաստակավոր կողբացի
16․12․2001թ․Մեծագույն հաճույթով դիտեցինք երեխաների անմիջական ու մաքուր աչքերով կատարած ստեղծագործությունները — հոյակապ են․․․
Նրանք սիրում ու տեսնում են գեղեցիկը, և ստեղծում են արվես։
Շնորհակալություն մեծ հաճույքի համար նրանց դաստիարակներին։
Ալեքսանդր Գրիգորյան
27․04․2003թ․
Կյանքը տխուր է, բայց այնունամենայնիվ՝ գունավոր, իսկ երբ այդ գույնը իմաստ է ստանում՝ տեղի է ունենում, կայանում է, հրաշքը․․․ Կեցցե Կարող Ղուլիջանյանը, որ իր շուրջը հավաքելով մի խումբ երեխաների (անշուշտ՝ շնորհալի և տաղանդավոր) կարողանում է մի ճեղքով, մի պատուհանով ավելացնել լույսն ու գեղեցիկը, և դրանով իսկ կյանքը դարձնել գեղեցիկի լուսավոր ու անպայմանորեն գունավոր։
Հավատում եմ, որ մի օր հպարտանալու ենք, որ այս հրաշալի միջոցառման (ցուցահանդեսի) մասնակիցն ու վկան ենք եղել։
Հրաշալի նկարիչներ են, որոնց գույներն ու հեղինակներն արդեն իսկ պահ տրվեցին հիշողությանս, որպեսզի այնտեղ ու կյանքում մնան մշտավառ ու հավիտենագո։
Ամենայն բարիք
Սիրով՝ Սամվել Բեգլարյան
29․12․2002թ․
Ինձ շատ ուրախացրեց հնագույն Կողբի այս նոր դպրոցը, գեղարվեստի դպրոցը, որը դառնալու է այս չնաշխարհիկ երկրամասի վերածվող մշակույթի կենտրոնը։
Ապրին աշակերտները, ապրի նրա տնօրենը ընկեր Կարոն, իմ լավագույն ընկերն ու բարեկամը։
Հ․Հ․ վաստակավոր նկարիչ
պրոֆ․ Հ․ Մամյան
29․08․2002թ․
—————————————————————-
Մեծագույն ուրախությամբ բացեցի այս ցուցահանդեսը և հույսով լցվեցի նրա մասնակիցների ապագայի նկատմամբ։
Հաջողություն Ձեզ իմ սիրելի սաներ։
Հ․ Մամյան
20․09․2003թ․
—————————————————————
Ամեն անգամ մի անսպասելի, մի բերկրանքի առաջ է կանգնեցնում Կողբի Կարո Ղուլիջանյանի գեղարվեստի դպրոցի ուսանողների հետ հանդիպումը։
Անսահմանորեն նվիրված իրենց արվեստին, իրենց գործին եզակի երևույթ է, և դա գալիս է իրենց ղեկավարից։
Երեխեք փառք Ձեզ, փառք Ձեր դպրոցին, Ձեր ղեկավարին։
Ձեր աշխատասիրությունը կհասցնի Ձեր նպատակին։
Միշտ Ձեր Հենրիկ Մամյան
16․07․2006թ․